Tíu hlutir sem þú vissir ekki um krullu

Kanada varð í gær Vetrarólympíumeistari í krullu kvenna öðru sinni og Kanadamenn fá tækifæri til að vinna tvöfalt því karlaliðið mætir Bretlandi í úrslitum karla í dag.

Keppt er í krullu í fimmta skipti á Vetrarólympíuleikum en hún hafði fyrir leikana í Naganó 1998 nokkrum sinnum verið sýningaríþrótt.

Þar sem Bretar eiga möguleika á gullverðlaunum í dag tóku fréttamenn BBC saman tíu athyglisverðar staðreyndir um krullu og sögu íþróttarinnar. Þær fylgja hér að neðan.

1. Fyrstu skráðu heimildirnar um krullu segja að hún hafi fyrst verið leikin í Skotlandi og Hollandi á 16. öld. Fyrstu reglurnar voru skrifaðar 1838 og fyrsta sambandið var stofnað í Edinborg.

2. Á meðal þeirra stórstjarna í heiminum sem stunda krullu er Óskarsverðlaunaleikarinn George Clooney. Hann varð ástfanginn af sportinu þegar hann kynntist því við tökur á kvikmyndinni Perfect Storm í Kanada árið 2000. Rokkarinn Bruce Springsteen er líka mikill aðdáandi krullu og tekur leik við og við þegar hann er á hljómleikaferðalagi með E Street Gang.

3. Krullusteinar eru gerðir úr granít og eru á frá 17,24-19,96kg þungir. Grantíið er fengið frá tveimur stöðum: Skosku eyjunni Alisa Craig og úr granítnámu í wales.

4. Krulla hefur komið við sögu í mörgum sjónvarpsþáttum og bíómyndum. Meðal annars Bítlamyndinni Help!

5. Í skotlandi var krulla leikin utandyra á frosnum vötnum og tjörnum þar til fyrst var spilað innanhúss á 20. öldinni. Þrátt fyrir það halda sumir Skota í hefðirnar og spila utandyra.

6. Sum af líkunum sem náð var úr Titanic eftir að það sökk árið 1912 voru færð til bráðabirða í félagsheimi Mayflower-krulluklúbbsins í Nova Scotia. Það var gert að tímabundnu líkhúsi eftir slysið.

7. Helsta framlag Englendinga til krullu er að finna upp á gerviísinn. Árið 1877 opnaði skautavell í Manchester og í mars sama ár fór þar fram fyrsti krulluleikurinn á gerviís. Skautavellinu var þó lokað skömmu síðar.

8. Árið 2008 gekk bandaríska sjónvarpsstöðin NBC frá samningi sem fól í sér að sýna 10 þætti af raunveruleikaþættinum Rockstar Curling. Stefnt var að því að sigurvegarnir fengu tækifæri til að keppa á bandaríska meistaramótinu og jafnvel fara á Vetrarólympíuleikana í Vancouver árið 2010. Þetta var einskonar Idol-keppni nema í krullu. Þættirnir fóru aldrei í framleiðslu.

9. Fyrst var keppt í krullu á Vetrarólympíuleikunum í Chamonix árið 1924. Þá var íþróttin aðeins sýningargrein eins og í Lake Placid 1932, Calgary 1988 og Albertville 1992. Krulla varð svo opinber Vetrarólympíugrein í Naganó 1998. Kanada og Sviss unnu fyrstu gullin.

10. Heiðarleg og drengileg framkoma er stór hluti af íþróttinni. Keppendur eiga að hrósa andstæðingnum fyrir góð skot og aldrei má fagna ef andstæðingurinn gerir mistök. Vanalega á tapliðið að bjóða sigurliðinu upp á drykk eftir leik. Það er þó ekki skylda á Vetrarólympíuleikunum.