Sá elsti fékk gull og sá yngsti brons | Myndband

Austurríkismaðurinn Mario Matt tryggði sér gullverðlaun í svigi karla á Vetrarólympíuleikunum í Sotsjí í dag.

Hann var með besta tímann eftir fyrri ferðina í morgun og sjötti besti tíminn í seinni ferðinni dugði honum til sigurs. Samanlagður tími Matts var 1:41,84 mínútur.

Hann hafði betur í baráttunni við besta svigkappa heims, heimsmeistarann Marcel Hirscher frá Austurríki, sem margir veðjuðu á að myndi vinna gullið í dag.

Henrik Kristoffersen, 19 ára gamall Norðmaður, fékk bronsið þrátt fyrir að vera bara með 15. besta tímann í fyrri ferðinni. Hann náði þeim þriðja besta í seinni ferðinni og kom í mark á samanlögðum tíma upp á 1:42,67 mínútur.

Brautin var erfið og féllu margir frábærir keppendur úr leik sem hjálpaði Norðmanninum að hirða bronsið en hann gerði vel í að komast niður á eins góðum tíma og raun bar vitni.

Kristoffersen er einn allra efnilegasti svigmaður heims en hann vann sitt fyrsta heimsbikarmót í Schladming í Austurríki á dögunum.

Með gullinu í dag varð Matt, sem er 34 ára gamall, sá elsti í sögunni til að vinna gullverðlaun í alpagreinum á Vetrarólympíuleikum. Kristofferssen er sá yngsti í sögunni. Sögulegt svig í Sotsjí.