Sparar skattfé og eykur öryggi almennings

Forstjóri Landhelgisgæslunnar hefur bent á ókosti þess að hafa tvískipt sjúkraflug á Íslandi en Gæslan og Mýflug sinna sjúkraflugi. Heilbrigðisráðherra boðar skýrslu um framtíðarstefnu í sjúkrafluginu. 

Georg Lárusson, forstjóri Landhelgisgæslunnar hefur bent á það að hafa allt sjúkraflug á einum stað feli í sér hagkvæmni og sparnað fyrir skattgreiðendur og auki öryggi. Ríkisendurskoðun tekur undir þessi sjónarmið í skýrslu.

Sjúklingar sem koma frá Vestmannaeyjum, Vestfjörðum, Norðurlandi og Austfjörðum eru fluttir með flugvélum Mýflugs á grundvelli samnings við Sjúkratryggingar Íslands en Landhelgisgæslan annast annað sjúkraflug.

Til skoðunar hefur verið hvort heppilegra sé að færa þetta allt undir gæsluna. Hefur sú umræða vaknað að nýju eftir umfjöllun um starfshætti Mýflugs í aðdraganda flugslyssins við Hlíðarfjallsveg hinn 5 5. ágúst í fyrra þegar TF-MYX fórst.

Eykur öryggi og sparar skattfé 

Í skýrslu ríkisendurskoðunar um sjúkraflug á Íslandi sem kom út í ágúst síðastliðnum er tekið undir þessi sjónarmið en þar segir:

„Helstu rök fyrir því að Landhelgisgæslan taki yfir sjúkraflug eru þau að þannig megi betur nýta mannskap stofnunarinnar, tæki og aðstöðu og auka öryggi landsmanna. Að auki styrkti slíkt fjárhagslegan grundvöll stofnunarinnar og færði allt sjúkraflug á Íslandi á eina hendi í stað tveggja eins og nú.“

Hvað er ríkisendurskoðun að segja? Hún er að segja að það myndi ekki aðeins spara peninga að flytja sjúkraflugið til Gæslunnar, það myndi einnig auka öryggi landsmanna. Skilaboðin eru býsna skýr.

Georg Lárusson var ekki tilbúinn að koma í viðtal á þessum tímapunkti. Afstaða hans er skiljanleg enda er umræða um stöðu sjúkraflugsins mjög viðkvæm í augnablikinu vegna slyssins við Hlíðarfjallsveg.

 „Ef það væri þannig þá væri það æskilegt, en það liggja engar úttektir fyrir hvort það sé framkvæmanlegt eða hversu hagkvæmt það væri. Það væri fínt að fá niðurstöðu af slíkri vinnu áður en maður tæki afstöðu til þess,“ segir Kristján Þór Júlíusson heilbrigðisráðherra.

Velferðarráðuneytið þarf að bregðast við óvissunni

Í skýrslu ríkisendurskoðunar sem vikið var að framar segir að „langvarandi vangaveltur innan stjórnsýslunnar um breytingar á rekstrarformi sjúkraflugs valdi óvissu sem velferðarráðuneyti þarf að draga úr með framtíðarstefnu í sjúkraflutningum.“

Hvar er þessi stefna? „Hún er í vinnslu og það liggja fyrir tillögur bæði frá árinu 2008 og árinu 2010 um sjúkraflutninga. Á þeim grunni ber okkur að vinna og nýta þá vinnu sem þar er til til þess að móta þessa framtíðarstefnu,“ segir Kristján Þór.