Lagerbäck tilkynnir Færeyjahópinn í dag

Lars Lagerbäck, þjálfari karlalandsliðsins í fótbolta, hefur boðað blaðamenn á sinn fund í dag þar sem hann tilkynnir landshóp sinn fyrir vináttuleik á móti Færeyjum á Laugardalsvellinum í næstu viku.

Þetta er síðasti undirbúningsleikur Íslands fyrir fjóra síðustu leiki liðsins í undankeppni HM. Einhverjir leikmenn úr Pepsi-deildinni fá mögulega tækifæri í þessum leik, enda í mun betra leikformi en flestir atvinnumannanna.

Í síðustu hópum Lars hafa aðeins markverðir liðsins verið að spila á Íslandi en það gæti breyst núna.

Íslenska karlalandsliðið hækkaði sig um þrjú sæti á nýjasta styrkleikalista FIFA sem gefinn var út í gær og er nú í 70. sæti listans.

Liðið mætir svo Sviss og Noregi á útivelli og Albaníu og Kýpur á heimavelli í undankeppni HM 2014 í haust.