Vissi svo sem að Lennon væri engin mannvitsbrekka

Framherjinn Steven Lennon hjá Fram greindi frá því í Fréttablaðinu í gær að hann væri í samningaviðræðum við stjórn Fram um nýjan samning. Hann sagðist vera ósáttur við að nýja stjórnin vildi láta hann greiða fyrir bíl og íbúð sem gamla stjórnin hefði verið búin að lofa honum.

Brynjar Jóhannesson, nýr formaður knattspyrnudeildar Fram, segist lítið botna í orðum Lennon í viðtalinu. „Þessi frétt er óskiljanleg. Þetta er alger þvæla," segir Brynjar ákveðinn og bætir við.

„Það er ýmislegt rétt í þessu. Það hafa verið viðræður um nýjan samning en það er enginn glæpur. Hann hefur fengið hverja einustu krónu greidda og ekkert tekið af honum. Við erum einfaldlega að taka á máli sem sat eftir hjá fyrri stjórn. Hann er með fáranlegan samning sem er ekkert eins og samningar eru almennt. Það er enginn bíll og ekkert húsnæði eins og hann segir í þessum samningi. Það er talað um eitthvað herbergi. Við vildum einfaldlega laga þetta til. Þessir hlutir verða að vera í samningi. Það er ekki bara hægt að segja hitt og þetta. Ef félagið á að skaffa honum þessa hluti þá verður það að vera í samningi."

Brynjar segist alls ekkert eiga í neinum deilum við Lennon en skilur ekki þau orð leikmannsins að hann hafi ekki heyrt frá félaginu í yfir tíu daga.

„Ég hitti hann á mánudag. Svo talaði ég við hann í fyrrakvöld þar sem hann spurði að því hvort hann mætti ekki fá sér Sky í íbúðina.Spurði hvort hann yrði ekki örugglega með hana fram í október. Ég sagði að það væri ekkert vandamál. Svo les maður í Fréttablaðinu að hann hafi ekki heyrt í okkur í tíu daga. Það er alveg óskiljanlegt. Það eru engin vandamál og ekkert verið að deila. Hann er að fá greitt eftir samningi og er að fá umfram samninginn bíl og íbúð þó svo það sé ekki í samningnum. Það er því ekki eins og menn séu að drepa hann. Við getum tekið það frá honum ef við viljum en við viljum ekki vera að standa í slíku," sagði Brynjar. En hvernig les hann í þetta útspil leikmannsins?

„Ég las ekkert annað en að þetta væri einhver KR-tilraun eina ferðina enn. Ég veit svo sem ekkert um það. Hann virkar núna á mig greyið eins og hann sé frekar einfaldur. Ég vissi svo sem að hann væri engin mannvitsbrekka en þetta er mjög sérkennilegt útspil. Þetta lítur ekkert vel út fyrir hann gagnvart hópnum. Ég fatta ekki alveg hvað hann er að fara. Ég nenni samt ekki að pirra mig á þessu því þetta er svo hlægilegt. Þetta er einn af þessum hlutum í boltanum sem maður botnar ekki í."

Lennon hefur áður lýst því yfir að hann vilji fara í KR. Eru einhverjar líkur á því að Framarar ákveði að selja leikmanninn?

„Það er ekki komið neitt tilboð í hann og við erum ekki að fara að selja hann. Auðvitað er allt til sölu en það stendur ekki til að selja hann. Við fengum leikmenn til liðsins og vorum að búa til hóp og hann er hluti af honum. Hann var eitthvað pirraður er við komum að málum og við fórum yfir það mál. Síðast er ég vissi var það mál frágengið. Þetta kom mér því á óvart. Hann verður ekki látinn fara nema það komi voðalega gott tilboð. Það eru allir falir en við ætlum ekki selja enda ekki auðvelt að fá framherja í dag."

Eins og áður segir hélt Brynjar að allt væri í góðu milli Lennons og Fram. Í ljósi þessa upphlaups leikmannsins segist hann verða að fara yfir málin með leikmanninum.

„Ég mun eðlilega ræða við hann. Þetta er ekki gott. Menn gera ekki svona. Það er klárt að við munum ræða við hann."