Guðjón Valur og Rut eru Handknattleiksfólk ársins

Stjórn Handknattleikssambands Íslands hefur útnefnt Guðjón Val Sigurðsson og Rut Arnfjörð Jónsdóttur Handknattleiksmann og konu ársins 2013.

Rut Arnfjörð Jónsdóttir er 23 ára gömul hægri skytta og leikur með danska liðinu Team Tvis Holstebro sem varð Evrópumeistari síðasta vor. Rut hefur verið lykilleikmaður í íslenska kvennalandsliðinu um nokkurt skeið.

Guðjón Valur Sigurðsson er 34 ára gamall hornamaður og leikur með þýsku meisturunum í Kiel. Guðjón Valur var tvöfaldur meistari á sínu fyrsta ári með Kiel. Guðjón Valur er fyrirliði íslenska landsliðsins og varð langmarkahæsti leikmaður liðsins á árinu þar sem hann missti ekki úr leik.