Magni sló KA út úr bikarnum

D-deildarlið Magna er komið áfram í 32 liða úrslit Borgunarbikar karla eftir óvæntan 2-1 sigur á nágrönnum sínum í KA þegar liðin mættust í kvöld í Boganum á Akueyri.

Hreggviður Heiðberg Gunnarsson og Lars Óli Jessen skoruðu mörk Magna í fyrri hálfleik en Bjarki Baldvinsson náði að minnka muninn fyrir KA sex mínútum fyrir leikslok.

Báðir markaskorarar Magna eru upphaflega Þórsarar og leiddist því örugglega ekki að sameinast í því að slá KA-menn út.

KA-menn ætla sér stóra hluti í B-deildinni í sumar en Bjarni Jóhannsson, fyrrum þjálfari Stjörnunnar, tók við liðinu í vetur. KA vann 1-0 útisigur á Selfossi í 1. umferð 1. deildarinnar.

Upplýsingar um markaskorara eru fengnar af vefsíðunni úrslit.net.