Kristján Hauksson, fyrirliði Fram, hættur hjá félaginu

Kristján Hauksson, fyrirliði Pepsi-deildar liðs Fram í fótbolta, mun ekki spila með liðinu í sumar en þetta kom fyrst fram á mbl.is í dag.

Brynjar Jóhannesson, formaður knattspyrnudeildar Fram, staðfesti við mbl.is að Fram og Kristján hefðu komist að samkomulagi um starfslok.

Kristján Hauksson er 26 ára miðvörður og uppalinn Framari en hann hefur spilað 107 leiki fyrir Safamýrarliðið í efstu deild og verið fyrirliði liðsins undanfarin þrjú sumur.

Kristján er annar miðvörðurinn sem yfirgefur Fram en fyrr í vetur fór Hlynur Atli Magnússon til Þórs á Akureyri.

Ólafur Örn Bjarnason og Bjarni Hólm Aðalsteinsson hafa hinsvegar samið við Fram og leysa því væntanlega miðvarðarstöðurnar saman í sumar.