Guðjón Pétur ekki lengi án félags - samdi við Breiðablik

Guðjón Pétur Lýðsson mun spila með Breiðabliki í Pepsi-deild karla í fótbolta í sumar en þetta kemur fram á fóbolti.net. Guðjón Pétur gerði starfslokasamning við Val í fyrrakvöld en var ekki lengi án félags því Atli Sigurðsson framkvæmdastjóri Breiðabliks staðfesti nýja samninginn á Facebook í kvöld.

Guðjón Pétur er 25 ára miðjumaður sem sló í gegn með Val sumarið 2011 (8 mörk og 4 stoðsendingar í 17 leikjum) og fór í kjölfarið á láni til sænska liðsins Helsingborg þar sem hann varð sænskur meistari og sænskur bikarmeistari án þess þó að fá að spila mikið.

Guðjón náði sér ekki eins vel á strik með Val síðasta sumar en hann skoraði þá 1 mark í 20 leikjum. Guðjón Pétur lék með Haukum áður en hann fór í Val.

Þetta er ekki í fyrsta sinn sem Guðjón fer í Breiðablik en hann lék einn leik með liðinu í úrvalsdeildinni sumarið 2007.

Blikar hafa nú fengið til sín þrjá sterka leikmenn en áður höfðu markvörðurinn Gunnleifur Gunnleifsson (frá FH) og sóknarmaðurinn Ellert Hreinsson (frá Stjörnunni) samið við félagið.