Doninger á leið frá ÍA

Enski miðjumaðurinn Mark Doninger er á leið frá Skagamönnum. Þetta staðfesti hann í samtali við Fótbolti.net í dag.

Líkt og Vísir hefur fjallað um lítur allt út fyrir að Gary Martin, liðsfélagi, landi og herbergisfélagi Doninger, sé á leið til KR. Nú virðast Skagamenn vera að missa Doninger einnig.

Englendingurinn sagði í samtali við Fótbolta.net að þeim Gary Martin hefði ekki líkað vistin á Akranesi. Þá sagði Doninger að hann kynni ekki við leikstíl liðsins.

Doninger var ekki í leikmannahópi Skagamanna þegar liðið lagði Selfoss að velli 4-0 í gærkvöldi. Hann hefur glímt við meiðsli aftan í læri en meiðslin hafa angrað hann töluvert í sumar.