HSÍ hefur ráðið Árna Stefánsson til starfa

Árni Stefánsson hefur hafið störf hjá Handknattleikssambandi Íslands sem verkefnastjóri fræðslu og útbreiðslumála. Hans hlutverk verður að móta og skipuleggja fræðslu- og útbreiðslustarf HSÍ. Þetta kemur fram í fréttatilkynningu frá HSÍ.

Meðal verkefna sem munu heyra undir svið Árna eru að vinna markvisst að því að efla áhuga og fjölga þátttakendum í handknattleik, skipuleggja og halda þjálfaranámskeið, búa til námskeiðsgögn og kynningarbæklinga. Hann mun einnig taka þátt í markaðsmálum og sinna öðrum tilfallandi verkefnum.

Árni hefur undanfarin tvö ár verið forstöðumaður íþróttaakademíu Framhaldsskólans í Vestmannaeyjum og ÍBV, auk þess að vera yfirþjálfari yngri flokka ÍBV í handknattleik.

Hann hefur komið víða við í þjálfun, var lengi aðstoðarþjálfari Alfreðs Gíslasonar hjá KA en hefur síðan þjálfað meistaraflokka Þórs, HK og FH auk þess að þjálfa yngri flokka hjá Þór, KA, HK, FH og ÍBV.