Umfjöllun, viðtöl og einkunnir: Keflavík - FH 2-4

FH skaust á topp Pepsideildar karla með góðum sigri á Keflavík í dag. Leikurinn endaði 2-4 fyrir gestina úr Hafnarfirðinum og var sanngjarn í meira lagi. Fyrri hálfleikur var frekar daufur og fátt um færi. FH-ingar voru þó hættulegri og skoruðu eina mark hálfleiksins. Þar var að verki Atli Viðar Björnsson.

Síðari hálfleikur var frábær skemmtun og mörkunum rigndi í Bítlabænum. Gestirnir komust í 0-3 með mörkum Guðjón Árna og Hólmars Arnar en Guðmundur Steinarsson svaraði fyrir Keflvíkinga með marki úr vítaspyrnu.

Fjörið var þó ekki á enda og liðin skoruðu eitt mark hvort áður en yfir lauk og voru það bestu menn vallarins sem gerðu það, fyrst Atli Guðnason fyrir FH og síðan Arnór Ingvi fyrir Keflavík. Lokastaðan 2-4 og verða það að teljast sanngjörn úrslit.

Heimir Guðjónsson: Fagleg frammistaðaHeimir Guðjónsson þjálfari FH var að vonum sáttur eftir leikinn „Þetta var fagmannleg frammistaða hjá mínum mönnum og ég er sáttur við sigurinn. Reyndar var það algjör óþarfi að hleypa þessum mörkum inn og við áttum að vera búnir að drepa leikinn í stöðunni 3-0."

Heimir var sáttur við framlag þeirra leikmanna sem komu inn í vörnina „Við vorum með breytta varnarlínu í þessum leik en þeir leikmenn sem komu inn í liðið stóðu sig með miklum sóma."

Heimir er kominn með lið sitt á toppinn og grætur það hreint ekki. „Við erum í fínum stað og höfum heilt yfir spilað fínan fótbolta það sem af er sumri. Það var bara leikurinn gegn KR sem var ekki nægjanlega vel spilaður af okkar hálfu en eins og staðan er í dag erum við bara vel sáttir."

Zoran: Annað og þriðja markið dróg úr okkur vígtennurnarZoran Daníel Ljubicic, þjálfari Keflavíkur, viðurkenndi að sínir menn hefðu mætt ofjörlum sínum í þessum leik. „Við vissum að FH er með frábært lið sem refsar grimmilega fyrir öll mistök og það kom á daginn. Annað og þriðja markið drógu úr okkur vígtennurnar og við verðum að passa okkur að gera ekki svona mistök gegn þessum sterku liðum."

Hann var engu að síður ánægður með margt hjá sínu liði. „Mér fannst mínir menn berjast mjög vel og þeir mega eiga það að þeir gerðu sitt besta hér í dag. Því miður var það bara ekki nóg."

Aðspurður um meiðsli Guðmundar Steinarssonar svaraði Zoran „Hann meiddist eitthvað lítillega og það var engin ástæða til að taka einhverja sénsa með hann. Það bíður okkar erfiður leikur gegn Fram í næstu umferð og við mætum bara grimmir í þann leik."