Ingólfur kominn í Val

Ingólfur Sigurðsson tilkynnti á Twitter-síðu sinni nú fyrir stundu að hann væri genginn til liðs við Val. Hann hefur því fengið sig lausan frá KR.

„Frábær ár hjá KR að baki, en er núna kominn heim! Áfram Valur!", skrifaði Ingólfur í kvöld. Fram kemur á heimasíðu Vals að samningur Ingólfs gildir til ársins 2013.

Frægt er þegar Ingólfur tilkynnti á Twitter að efnilegir leikmenn ættu að fara eitthvað annað en í KR. Hann tók færsluna út stuttu síðar en þetta varð til þess að hann lýsti því yfir að hann vildi losna frá KR.

Rúnar Kristinsson, þjálfari KR, sagði svo fyrir helgi að Ingólfur ætti ekki afturkvæmt í meistaraflokk félagsins. Hann hefur nú fengið lausn sinna mála og greinilega áður en félagaskiptaglugginn lokaði á miðnætti í nótt.

Ingólfur er átján ára gamall og hefur lengi þótt meðal efnilegustu knattspyrnumanna landsins.