Ölgerðin: Það má ekki kalla Peppa Pepsi kallinn

Ölgerðin hefur látið hanna lukkudýr Pepsi-deildarinnar og ber hann nafnið „Pepsi-dósin“ og gælunafnið er „Peppi“. KSÍ kynnti kappann sem Peppa Pepsi-karl en það féll ekki í kramið hjá mönnum í Ölgerðinni sem sáu sig tilneydda til að ítreka rétt nafn nýja lukkutröllsins.

„Til að gæta jafnréttis í umfjöllun á lukkudýrinu, þá heitir lukkudýr Pepsi-deildarinnar „Pepsi-dósin“ og gælunafnið er „Peppi“.

Við viljum forðast eftir fremsta megni að lukkudýrið sé kallað „Pepsi kallinn“ segir í tilkynningu Ölgerðarinnar til fjölmiðla.

Markmiðið með Peppa er auðvitað að auka skemmtanagildi leikjanna fyrir vallargesti og þá sérstaklega fyrir krakkana.  

Lukkudýrið verður frumsýnt á stórleik FH og Breiðabliks í Hafnarfirði á sunnudaginn þar sem mætast bikarmeistararnir og Íslandsmeistararnir.