McShane mögulega á leið til Grindavíkur

Óvíst er hvort að Paul McShane verði áfram hjá Keflavík en samkvæmt heimildum Vísis er hann með samningstilboð í höndunum frá Gríndavík.

Þorsteinn Magnússon, framkvæmdarstjóri knattspyrnudeildar Keflavíkur, sagði við Vísi í dag að félagið ætti nú í viðræðum við McShane um nýjan samning eftir að sá gamli rann út í haust.

„Við erum að vinna í okkar samningsmálum og það tekur einfaldlega tíma," sagði Þorsteinn. „Ég tel töluverðar líkur á því að hann verði áfram hjá okkur. Ég segi þó ekki að ég hafi engar áhyggjur af þessu en við flýtum okkur hægt í þessu máli eins og öðrum."

Paul McShane hóf feril sinn hér á landi með Grindavík árið 1998 og lék með liðinu í tíu ár þar til hann gekk í raðir Fram. Hann spilaði með þeim bláklæddu í tvö tímabil og fór svo til Keflavíkur fyrir síðasta sumar.

Alls á hann að baki 232 leiki í deild og bikar með þessum þremur félögum og hefur skorað í þeim 37 mörk. Hann er 32 ára gamall.