Stangarstökkvari hleypur nakin um stræti Parísar - myndband

Franski stangarstökkvarinn Romain Mesnil hefur ákveðið að vekja athygli á raunum sínum með því að hlaupa nakinn um þekktustu ferðamannastaði Parísar.

Mesnil vann til silfurverðlauna á HM í frjálsum íþróttum í Osaka í Japan og hefur verið með styrktaraðilasamning við íþróttarisann Nike. Samningurinn rann hins vegar út í fyrra og hefur hann ekki enn fundið sér nýjan styrktaraðila.

„Það er líklegt að þetta hafi verið gert vegna niðurskurðar. Þetta er út af kreppunni," sagði Mesnil við fréttastofu Reuters.

Mesnil er ekki eini íþróttamaðurinn sem á í slíkum vandræðum en fáir hafa gripið til þeirra ráða sem hann hefur gert nú.

Athæfið hefur vakið talsverða athygli í heimalandi hans en myndband af því má sjá hér.