Kaupþingsstjórar höfðu enga alþjóðareynslu og litla bankareynslu

Tony Shearer fyrrum forstjóri Singer & Friedlander, banka Kaupþings í Bretlandi, segir að bankastjórar Kaupþings á Íslandi hafi ekki haft neina alþjóðareynslu og litla bankareynslu þegar þeir festu kaup á Singer & Friedlander árið 2005.

Eins og fram kom hjá Fréttastofu í gærkvöldi segir Shearer nú að hann hafi varað breska fjármálaeftirlitið (FSA) við því að leyfa Kaupþingi að yfirtaka Singer & Friedlander. Raunar segir hann að FSA hefði átt að hafa nægar upplýsingar í höndunum til að koma í veg fyrir yfirtökuna.

Shearer mun koma fyrir sérstaka rannsóknarnefnd á vegum breska fjármálaráðuneytisins í dag en nefndin kannar nú ástæðurnar fyrir bankakreppunni sem ríkt hefur í Bretlandi. Ummælum Shearer, sem koma fram í bréfi hans til nefndarinnar var lekið í breska fjölmiðla í gærkvöldi.

Bloomberg-fréttaveitan tekur málið upp í dag og þar segir Cerris Tavinor talskona FSA að eftirlitið telji að bréfið gefi ekki rétta mynd af atburðarrásinni í kringum yfirtöku Kaupþings á Singer & Friedlander.

Shearer sagði sig úr stjórn Singer & Friedlander áður en yfirtökutilboð Kaupþings var lagt fram fyrir hluthafa bankans. Hafnaði hann boði um að verða stjórnarformaður nýrrar stjórnar því að hann..." var ekki tilbúinn til að bera ábyrgð gagnvart FSA á félagi í eigu Kaupþings..." eins og það er orðað í bréfinu.

Jafnframt segir Shearer að þáverandi stjórn Singer & Friedlander hafi deilt með honum áhyggjum af yfirtöku Kaupþings.