Rússnesk úrslitaviðureign í París

Það verða tvær rússneskar tennisstjörnur sem mætast í úrslitum einliðaleiks kvenna á Opna franska meistaramótinu í tennis á Roland Garros.

Dinara Safina er efst á styrkleikalista keppanda mótsins og mætir Svetlönu Kuznetsovu í úrslitunum á laugardag. Kuznetsova er í sjöunda sæti styrkleikalistans.

Safina vann nokkuð auðveldan sigur á rúmenska táningnum Dominiku Cibulkovu fyrr í dag, 6-3 og 6-3.

Kuznetsova átti í aðeins meiri vandræðum með Ástralann Samönthu Stosur. Hún vann fyrsta settið 6-4 og átti svo möguleika að vinna viðureignina í bráðabana í öðru settinu. Hún komst í 5-2 forystu í bráðabananum en tapaði næstu fimm stigum og þar með lotunni, 7-6.

En Kuznetsova vann öruggan sigur í oddasettinu, 6-3.

Á morgun fara fram undanúrslitaviðureignirnar í einliðaleik karla. Annars vegar mætast Fernando Gonzalez og Robin Söderling og hins vegar Roger Federer og Juan Martin del Potro.