Erfitt hjá Nadal

Rafael Nadal mátti þakka fyrir að komast áfram í þriðju umferð opna bandaríska meistaramótsins í tennis í nótt.

Nadal mætti Þjóðverjanum Nicolas Kiefer og vann 6-0, 3-6, 6-3 og 6-4. Nadal mætir næst öðrum Spánverja, Nicolas Almagro.

Nadal er enn að jafna sig eftir tveggja mánaða fjarveru vegna meiðsla og var því ekki upp á sitt besta í nótt. Hann byrjaði mjög vel en gerði svo mörg mistök í öðru settinu.

Leikar voru jafnir í þriðja settinu en Nadal náði að skríða fram úr að lokum og fagnaði svo góðum sigri.

Bretinn Andy Murray lenti í örlitlum vandræðum með Paul Capdeville í nótt en vann að lokum öruggan sigur, 6-2, 3-6, 6-0 og 6-2. Murray mætir næst Bandaríkjamanninum Taylor Dent.

Williams-systurnar eru báðar komnar áfram í fjórðu umferð í einliðaleik kvenna eftir örugga sigra á andstæðingum sínum í nótt.

Serena Williams mætir næst Denielu Hantuchova en Venus leikur gegn Kim Clijsters.