Sharapova og Ivanovic í úrslitin

Maria Sharapova og Ana Ivanovic tryggðu sér í nótt sæti í úrslitum einliðaleiks kvenna á opna ástralska meistaramótinu í tennis.

Ivanovic, sem er frá Serbíu, vann Slóvakann Danielu Hantuchova í spennandi viðureign eftir að hafa tapað fyrstu lotunni 6-0.

Ivanovic vann aðra lotuna 6-3 og var staðan 4-4 í oddalotunni þegar Ivanovic færði sér mistök Hantuchovu í nyt og vann 6-4.

Sharapova vann Serbann Jelenu Jankovic nokkuð auðveldlega, 6-3 og 6-1. Sharapova hefur verið að spila gríðarlega vel og vann til að mynda Justine Henin í fjórðungsúrslitum í tveimur lotum.

Henin er í efsta sæti styrkleikalista Alþjóða tennissambandsins.