Sveppir nærast á geislavirkni

Vísindamenn við Albert Einsteinstofnun Yeshiva-háskólans hafa komist að því að fjöldi sveppategunda getur nærst á geislavirkni.

Sé hófleg geislavirkni til staðar vaxa þeir betur og fjölga sér hraðar. Rannsókn á þessum hæfileika sveppa hefur staðið yfir í fimm ár. Kveikjan var þegar vísindamenn tóku eftir því að ákveðnar sveppategundir döfnuðu afar vel á veggjum híbýla í Chernobyl.

Uppgötvunin getur haft ýmsa kosti í för með sér. Meðal annars er gælt við þá hugmynd að rækta matsveppi úti í geimnum fyrir svanga geimfara. „Mikið er af jónandi geislun í geimnum. Sveppir sem nýta sér hana gætu verið óendanleg mataruppspretta fyrir geimfara í löngum verkefnum og þegar nema á nýjar plánetur," sagði dr. Ekaterina Dadachova, stjórnandi rannsóknarinnar.