Sumarleyfið borgaði sig

Hún var skrýtin þessi utanlandsferð til Spánar. Í stað þess að liggja marineraður með tærnar upp í loft í steikjandi stiga hita þá lá ég í símanum. Bölvaður tölvumaðurinn kom aldrei með mótaldið þannig að síminn var eina vopnið sem ég hafði til þess að fylgjast með ævintýralegum hækkunum á markaðnum í síðustu viku. Þótt mér hafi mistekist að vinna í tanninu þá borgaði ferðin sig margfalt upp.

Ekki nóg með það að hlutabréfin hækki óðfluga heldur er fasteignamarkaðurinn í miklu stuði. Hver hefði búist við því að hann ætti eftir að koma svo sterkur sem raun ber vitni? En auðvitað er margt sem hjálpar þar til: Fólksfjölgun, ekkert atvinnuleysi, sterk króna og fremur lágir vextir á húsnæðislánum í sögulegu ljósi.

Actavis-peningarnir koma inn á bankabækurnar í dag en ég held að þeir séu að stórum hluta komnir í vinnu. Þeir ættu þó að halda veislunni gangandi og spurning hvort fasteignamarkaðurinn njóti ekki góðs af þeim.

Ég tel að hlutabréfamarkaðurinn hafi tekið út sína mestu hækkun í bili og þarf helvíti góð uppgjör til að halda bönkunum í hæstu hæðum. En þar eru alltaf kauptækifæri. Ég tók stærri hlut í Atorku, enda fór orðrómur um að FL Group yfirtaki félagið á flug á ný. Mér finnst þó ólíklegt að Hannes kaupi Atorku. Sé frekar fyrir mér að Jarðboranir verði seldar til Geysis Green Energy eða jafnvel Hitaveitu Suðurnesja. Magnús Jónsson og félagar veðjuðu svo sannarlega á réttan hest þegar þeir tóku Jarðboranir yfir fyrir einu og hálfu ári síðan. Þeir fjárfestu í framtíðinni en ég læt mér nægja sögusagnir. Og mér finnst ekki leiðinlegt að taka inn fjórðungshækkun á einum mánuði.

Spákaupmaðurinn á horninu.