Ragga virðist ætla bresta í grát

„Það segir sig náttúrulega sjálft að það er leiðinlegt að vinna með manneskju sem virðist ætla bresta í grát allan daginn,“ segir Bergvin Oddsson, formaður Ungmennahreyfingar blindrafélagsins, um rödd nýs talgervils, sem notaður er í skjálestrar forritunum fyrir blinda og sjónskerta.

Slíkur búnaður hefur verið til á íslensku frá því 1990 og hefur lengst af verið notuð karlmannsrödd sem kölluð er Snorri. Nýlega kom á markað nýrri og fullkomnari talgervill að nafni Ragga og var henni ætlað að taka við af Snorra. Hins vegar virðast viðtökur blindra og sjónskertra hafa verið fremur slæmar þar sem röddin þykir helst líkjast málrómi grátklökkrar konu.

Hartmann Kr. Guðmundsson, forstöðumaður Örtækni en fyrirtækið sér um sölu og þjónustu á hjálparbúnaði fyrir fatlaða, segir ástæðu gallans vera að fínstillingu milli orða vanti. Vandamálið sé ekki röddin en hana lagði fyrrverandi þulan Ragnheiður Elín Clausen til heldur í tækniatriðum framleiðandans Nuance.

„Það er búið að leggja mikla vinnu og peninga í þennan talgervil þannig við áttum ekki von á öðru en að þetta yrði í lagi,“ segir Hartmann. Hann segir fólk hafa orðið hálf undrandi yfir því að svona atriði hefði ekki verið lagfært áður en talgervillinn fór í dreifingu. Hann eigi þó von á því að það verði gert með haustinu og að þá verði hægt að setja röddina inn í fleiri forrit.