Ánægður með sigur á sterku liði Bremen

Jose Mourinho, knattspyrnustjóri Chelsea, var mjög ánægður með sigur sinna manna á Werder Bremen í meistaradeildinni í kvöld, en viðurkenndi að þýska liðið hefði verið betri aðilinn á köflum.

"Ég var mjög ánægður með fyrri hálfleikinn og þó við næðum ekki að skapa okkur mörg færi, náðum við að skora og vorum fastir fyrir í vörninni. Í síðari hálfleik verð ég að viðurkenna að þeir voru betri á löngum köflum og það voru 20 mínútur sem þeir voru miklu sterkari en við. Það var því nokkur léttir fyrir okkur að ná að skora annað markið og þó ég hefði gjarnan vilja fá eitt mark enn - hefðu það sannarlega verið ósanngjörn úrslit fyrir Bremen, því þeir spiluðu mjög vel í kvöld."