Ósáttur við að fá ekki að spila úrslitaleikinn

Jose Antonio Reyes segir að það hafi verið dropinn sem fyllti mælinn fyrir sig hjá Arsenal þegar hann fékk ekki að koma við sögu í úrslitaleik meistaradeildarinnar í vor, en Spánverjinn tjáði sig um brotthvarf sitt frá enska liðinu þegar hann var kynntur til sögu á blaðamannafundi hjá Real Madrid í dag.

Reyes er nú genginn í raðir Real Madrid í skiptum fyrir Brasilíumanninn Julio Baptista, en hér er um lánssamninga að ræða þangað til annað kemur í ljós. Reyes segist einfaldlega aldrei hafa fundið sig á Englandi síðan hann gekk í raðir Arsenal frá Sevilla á sínum tíma.

"Vissulega átti ég erfitt með að aðlagast tungumálinu og þjóðarandanum í London, en það var dropinn sem fyllti mælinn þegar ég fékk ekki að spila úrslitaleikinn í meistaradeildinni," sagði Reyes. "Arsene Wenger er sannarlega frábær stjóri, en það er Fabio Capello líka. Ég talaði við Wenger í sumar og átti við hann gott spjall, en í framhaldi af því ákvað hann að leyfa mér að fara," sagði Reyes, sem vonast til að vinna sér fast sæti í liði Real Madrid í vetur.