Spænskir fjölmiðlar hæla Eiði Smára

Spænskir fjölmiðlar halda vart vatni yfir ljóshærða víkingnum Eiði Smára Guðjohnsen í dag eftir að hann tryggði Barcelona 3-2 sigur á Celta Vigo í opnunarleik Evrópumeistaranna í spænsku deildinni í gærkvöld.

Eiði Smára er þar skipað á bekk með hinum heimsþekktu snillingum sem fyrir eru hjá liðinu, en menn eins og Ronaldinho, Samuel Eto´o og Lionel Messi eru þegar í guðatölu hjá félaginu. Jón Örn Guðbjartsson, fréttamaður NFS í Katalóníu fer í gegn um umsagnir spænskra fjölmiðla í íþróttafréttum NFS klukkan 18:15 í kvöld. Jón Örn starfaði sem íþróttafréttamaður á Stöð 2 þegar stöðin fór í loftið fyrir röskum tveimur áratugum og fylgist grannt með frammistöðu Eiðs Smára á spænskri grundu um þessar mundir.