Vissi að við fengjum Barcelona

Peter Kenyon segir að það hafi nánast legið í loftinu að Chelsea og Barcelona ættu eftir að mætast enn eina ferðina í dag, þegar dregið var í riðlakeppni meistaradeildar Evrópu. Hann skorar þó á menn að gleyma ekki hinum liðunum tveimur í A-riðlinum.

"Mér fannst þetta liggja í loftinu," sagði Kenyon í dag þegar hann var spurður út í þá merkilegu staðreynd að Chelsea og Barcelona mætist nú þriðja árið í röð í keppninni. "Annars langar mig að benda á að það eru fleiri lið en við og Barcelona í þessum riðli og lið Werder Bremen er sannarlega ekki auðvelt viðureignar. Þetta er það sem fólk vill sjá og ég vona bara að menn einbeiti sér að því að spila fótbolta í þetta sinn," sagði Kenyon, en oft hefur verið grunnt á því góða milli félaganna á síðustu tveimur árum.