Hargreaves er ekki til sölu

Forráðamenn Þýskalandsmeistara Bayern Munchen voru fljótir að bregðast við þeim tíðindum sem bárust fyrr í dag þess efnis að enski landsliðsmaðurinn Owen Hargreaves væri á leið til Manchester United. Framkvæmdastjóri Bayern segir málið einfalt - Hargreaves sé alls ekki til sölu.

"Hargreaves er samningsbundinn Bayern til ársins 2010 og það er tilgangslaust að ræða hugsanleg félagaskipti hans. Hann er ekki til sölu," sagði Uli Hoeness, framkvæmdastjóri þýska félagsins.

Hargreaves lýsti því yfir í samtali við þýska blaðið Bild í dag að hann hefði mikinn áhuga á að ganga í raðir Manchester United ef tækifærið gæfist, en hvorki framkvæmdastjóri né þjálfari Bayern er hrifinn af þeim áformum hans.