Larsson fæst ekki til að vera áfram

Frank Rijkaard, knattspyrnustjóri Barcelona segist ásamt öllu starfsliði sínu hafa gert ótal árangurslausar tilraunir til að sannfæra sænska sóknarmanninn Henrik Larsson um að vera eitt ár í viðbót í herbúðum liðsins, en Larsson ætlar sem kunnugt er að ganga í raðir Helsingborg í heimalandi sínu í sumar.

Larsson hefur farið á kostum með Barcelona undanfarið og hefur skorað í fimm leikjum í röð í spænsku deildinni. Hann hefur skorað níu mörk í úrvalsdeildinni í vetur þrátt fyrir að vera nær aldrei í byrjunarliðinu.

"Við höfum allir reynt að fá hann til að vera um kyrrt, en allt kemur fyrir ekki. Hann er ákveðinn í að fara aftur heim og við verðum bara að virða þá ákvörðun," sagði Rijkaard. "Hann er fyrirmyndar íþróttamaður og á meðan margir framherjar væla yfir því að vera á bekknum, hefur hann ekki látið það á sig fá," sagði stjórinn.