Ákvörðun um matsmenn frestað

Héraðsdómur Reykjavíkur frestaði nú síðdegis ákvörðun um hvort hlutlausir matsmenn verði kallaðir til í Baugsmálinu. Sigurður Tómas Magnússon, settur ríkissaksóknari, óskaði eftir að hlutlausir sérfræðingar yrðu fengnir til að leggja mat á gögnin sem lögð hafa verið fram.

Gögnin sem Sigurður Tómas vill láta fara yfir eru meðal annars útskriftir af tölvupóstum og önnur rafræn gögn. Hann vill láta meta sönnunargildi gagnanna. Ágreiningur er milli ákæruvalds og verjenda um hvort kalla skuli til matsmenn og fá hvorir tveggja tækifæri til að gera grein fyrir sinni afstöðu þegar málið verður tekið fyrir á fimmtudag.