Verðum að ná í 20 stig fyrir jól

Birmingham hefur gengið skelfilega í ensku úrvalsdeildinni það sem af er leiktíð og liðið situr nú í 19. sæti deildarinnar með aðeins sex stig úr fyrstu tólf leikjunum. Steve Bruce hefur sett liðinu markmið og ætlar því að vera komið með 20 stig um jólin.

"Við verðum að ná í 12-14 stig þangað til, ef við ætlum okkur að eiga einhverja möguleika. Við verðum að halda sæti okkar í deildinni og sex stig úr tólf leikjum er fjarri því að vera ásættanlegur árangur. Við getum þó huggað okkur við það að öll lið fara í gegn um slæma kafla og vonandi erum við búnir að fara í gegn um slæma kaflann okkar. Þegar við fáum eitthvað af þessum leikmönnum okkar til baka úr meiðslum, trúi ég að liðið nái að rétta aðeins úr kútnum," sagði Bruce.