Aukaæfingar fyrir Ronaldinho

Frank Rijkaard knattspyrnustjóri Barcelona er síður en svo sáttur við leikformið á besta knattspyrnumanni í heimi, Brasilíumanninum Ronaldinho leikmanni félagsins. Stjórinn hefur sett á aukaæfingar fyrir Ronaldinho til þess að koma honum í betra form og lét úthaldsþjálfari Barcelona, Ronaldinho vera eftir á æfingu á fimmtudag. Á meðan aðrir leikmenn liðsins fóru í sturtu sást sóknarmaðurinn hlaupa hringinn í kringum æfingasvæðið af mikilli ákefð og virtist ekkert taka því illa þótt hann þurfi að púla meira en félagar sínir í liðinu. Það virðist ekki koma mikið niður á Barcelona að snillingurinn sé ennþá að leita að forminu því liðið vann öruggan 2-0 útisigur á Werder Bremen í Meistaradeildinni í vikunni. Þá hefur liðið unnið einn leik og gert eitt jafntefli í spænsku deildinni.