Pearce stendur með sínum manni

Stuart Pearce, knattspyrnustjóri Man. City, hefur komið markverði sínum David James til varnar, en hann átti hörmulegan leik með Englandi gegn Dönum í gær og hefur þurft að þola mikil skítköst frá breskum fjölmiðlum. "Þetta hefur alltaf verið svona með James, menn fylgjast alltaf með mistökum hans og taka hann í gegn fyrir þau. Það sem mestu máli skiptir fyrir mig er hvernig hann spilar fyrir félagið sitt og hann hefur enn ekki brugðist mér þar," segir Pearce. James sjálfur segist ekki hafa verið nægilega undirbúinn fyrir leikinn og viðurkennir að hann hafi ekki átt góðan dag. "Ég undirbjó mig ekki nógu vel þar sem ég vissi að ég myndi ekki byrja inn á," sagði James sem leysti Paul Robinson af í hálfleik. "Þetta voru mikil mistök hjá mér. Ég var ekki reiðubúinn að koma inn á."