Svíar líða fyrir Tsjernóbyl-slysið

Talið er að ríflega áttahundruð manns í norðurhluta Svíþjóðar hafi fengið krabbamein í kjölfar kjarnorkuslyssins í Tsjernóbyl árið 1986. Þetta er niðurstaða nýrrar rannsóknar um afleiðingar slyssins. Geislavirk ský fóru yfir norðurhluta Evrópu í kjölfar slyssins og merkjanleg aukning varð á krabbameinstilfellum. Vísindamennirnir segja að þegar búið sé að gera ráð fyrir öllum öðrum mögulegum orsökum krabbameins þá standi 849 óútskýrð tilfelli eftir sem aðeins verði skýrð með geislavirkni frá Tsjernóbyl.