„Gríðar­lega særandi að hlusta á þetta“

Þorleifur er einn af fimmtán fulltrúum Íslands í landsliðinu í bakgarðshlaupi sem hefur keppni á laugardaginn og þykir líklegur til að hlaupa lengst Íslendinganna.

Hann setti Íslandsmet sitt í Elliðaárdalnum árið 2024 þegar hann hljóp 62 hringi (á jafnmörgum klukkutímum) eða samtals 415,4 kílómetra.

Íslenski hópurinn er öflugur og ljóst að met Þorleifs gæti verið í hættu en til þess þurfa að minnsta kosti tveir hlauparar að fara 62 hringi því um leið og aðeins einn hlaupari er eftir í bakgarðshlaupi er keppni hætt.

„Hann er ekki að fara að leyfa neinum öðrum að taka þetta Íslandsmet“

Í umræðuþætti á Vísi um landsliðakeppnina hrósaði hlaupakappinn Egill Trausti Ómarsson Þorleifi í hástert og sagði hann besta bakgarðshlaupara landsins. Í kjölfarið fylgdu hins vegar ummæli sem fóru afar illa í Þorleif:

„Ef hann sér fram á það að hann er ekki að fara að ná Íslandsmetinu og hann er einn eftir með einhverjum öðrum… hann hættir. Hann er ekki að fara að leyfa neinum öðrum að taka þetta Íslandsmet,“ sagði Egill en ummælin má sjá hér að neðan, eftir 36:15 mínútur.

„Annaðhvort hættir hann snemma eða vinnur þetta,“ bætti Egill Trausti við en Garpur I Elísabetarson sem stýrði þættinum var ekki alveg sammála:

„Ég held að það verði ekki til aðstæður þar sem hann og einhver einn annar verða eftir og að hann haldi eitthvað annað en að hann muni vinna þetta. Ef hann nær þangað þá sleppir hann því ekkert. Hann hefur alveg tapað á móti Mari [Järsk sem er einnig í landsliðinu] og vinnur ekkert allar keppnir en ég held að það verði mjög forvitnilegt að sjá hvernig hann bregst við. Hann allavega stefnir á sigur,“ sagði Garpur.

„Ef ég get aðstoðað mun ég alltaf gera það“

Þorleifur tjáði sig svo sjálfur um málið í færslu á Instagram í kvöld og skrifaði:

„Gríðarlega særandi að hlusta á þetta. Að gefa það í skyn að ég myndi frekar hætta en að eiga á hættu að missa Íslandsmetið.“

Þorleifur benti jafnframt á að ef hann stæði einn eftir með öðrum hlaupara þá væri hann spenntur fyrir því að bæta sinn besta árangur þó að það gæti þýtt að meðhlaupari hans næði af honum Íslandsmetinu.

„Hvernig væri að hugsa að ef ég enda sem „assist“ og missi metið, þá er ég að öllum líkindum sjálfur að bæta mitt PB og ég er mjög til í það!

Ég geri mér fulla grein fyrir því að þetta met verður slegið. Kannski um helgina, kannski eftir nokkur ár. Ef ég get aðstoðað viðkomandi við að ná því, þá mun ég alltaf gera það. Alltaf þegar einhver hefur beðið mig um ráð hef ég veitt aðstoð og reynt að hjálpa. Þannig virkar þetta sport,“ skrifar Þorleifur.

Landsliðakeppnin í bakgarðshlaupi hefst eins og fyrr segir á laugardaginn og verður í beinni útsendingu á Vísi.