Þegar allt er að fara fjandans til…

En tók eitthvað betra við? 

Varla.

Kjarasamningar í uppnámi, þingið að setja sig í stellingar (hávaðinn er hafinn!) og almennt er umræðan á frekar neikvæðum nótum. 

Svo ekki sé talað um Pisa...

Stjörnurnar á sviðinu eru helst stjórnarliðar, stjórnarandstaða, forkólfar verkalýðsfélaga og forystufólk atvinnulífs en við þessa hópa bætast síðan allir hinir við sem eru aldeilis ósammála og vilja láta í sér heyra. Meira að segja Trump er nú búinn að eigna sér Ísland.

Er kannski allt að fara fjandans til?

Í þessum vikulokum beinast góðu ráðin að þeim hópi fólks sem upplifir sig svolítið andlega búið á þessu öllu saman.

Allt svo neikvætt eitthvað að það er ekki hægt annað en að hafa áhyggjur af því að rétt sé að hafa áhyggjur af öllu.

Allt hefur þetta áhrif á það hvernig okkur líður og hvernig okkur gengur. Meðal annars í vinnu og námi.

Hér eru fern hagnýt ráð til að verja geðheilsuna:

1. Tímastjórnun á fréttir og samfélagsmiðlum

Rannsóknir sýna að stöðug neysla á neikvæðum fréttum getur valdið langvinnum streitueinkennum og dregið úr andlegri seiglu. Í umfjöllun The Guardian um skaðsemi „dómsdagsskruns“ (e. doomscrolling) benda sérfræðingar á mikilvægi þess að setja skýr tímamörk, slökkva á tilkynningum og forðast fréttalestur í rúminu til að hlífa taugakerfinu.

2. Settu orkuna í þitt eigið áhrifasvæði

Ásgeir sér um stýrivextina og þú ert ekki beintengdur samningum um kjarasamninga né hefur þú nokkuð um fjárlögin að segja. Að minnsta kosti ekki fyrr en í næstu kosningum. Í augnablikinu er því skynsamlegast að setja orkuna í þau mál sem þú getur haft áhrif á. Að hafa stöðugar áhyggjur af hlutum sem eru algjörlega utan okkar stjórnar tæmir orkubirgðirnar hratt.

3. Birta og hreyfing fyrir veturinn

Haustþreyta og skammdegisdrungi byrja gjarnan að gera vart við sig einmitt á þessum árstíma. Líkamsrækt og dagsbirta eru ekki bara góð fyrir líkamann, heldur beinlínis nauðsynleg fyrir efnabúskap heilans. Sérfræðingar Mayo Clinic um árstíðabundið þunglyndi og forvarnir benda á að stuttur göngutúr utandyra snemma dags, dagsbirtulampar og regluleg hreyfing geti skipt sköpum við að koma í veg fyrir að við verðum orkulaus og niðurdregin þegar haustar.

4. Skjólið er heima

Ef andrúmsloftið í samfélaginu er eitrað og kalt þarftu að eiga öruggan griðastað heima. Prófaðu að setja tímabundið samræðubann á stjórnmál og kjaramál yfir kvöldmatarborðinu. Kveiktu á kertum, taktu upp bók í stað þess að horfa á umræðuþætti og hlúðu að nærumhverfinu.

Við fáum engu breytt um það að veturinn nálgast og pólitíkin mun áfram vera hávaðasöm. En við ráðum því hvort við mætum þeim veruleika með tættar taugar eða meðvituð um að vernda okkar eigið andlega rými.