Shelton hafði betur gegn Alcaraz í leik sem stóð fram til morguns

Stórleikur var á Opna bandaríska risamótinu í tennis í morgun þar sem heimamaðurinn Ben Shelton mætti Carlos Alcaraz, ríkjandi meistara mótsins.

Alcaraz vann fyrsta settið naumlega 7-6 en tapaði svo næstu tveim 6-1. Fjórða settið vann Alcaraz 6-1 og því ljóst að úrslitin myndu ráðast í úrslitasettinu. Mikil spenna var í úrslitasettinu og var staðan orðin 6-6 og virtust hvorugir ætla að gefast upp.

Leikmennirnir fóru því í tíu stiga umspil þar sem fyrsti leikmaðurinn til að fá tíu stig myndi vinna leikinn. Þar byrjaði Ben Shelton betur en ljóst var að gríðarlega mikilvægt var að halda uppgjafarréttinum. Báðir leikmenn græddu mikið af stigum út frá uppgjöfum sínum.

Alcaraz náði að komast í 5-3 og virtist ætla að sigla sigrinum heim en heimamaðurinn Shelton var langt frá því að gefast upp. Alcaraz var orðinn þreyttur og byrjaði að gera mistök sem Shelton var duglegur að nýta. Staðan var 9-7 fyrir Shelton og átti hann uppgjafarréttinn. Hann skoraði strax úr fyrstu uppgjöfinni og vann þar af leiðandi ótrúlegan sigur á Carlos Alcaraz.

Þetta er í fyrsta skipti sem Shelton nær að vinna Alcaraz en þetta var í fjórða skipti sem þeir mætast sem atvinnumenn. Leikurinn stóð í fjóra og hálfan tíma og endaði klukkan hálf fjögur á staðartíma. Leikur á Opna bandaríska risamótinu hefur aldrei klárast eins seint.

Ben Shelton mætir landa sínum Frances Tiafoe í undanúrslitum sem vann einnig maraþonleik. Búast má því við gríðarlegri skemmtun þegar Shelton og Tiafo mætast en báðir hafa verið að spila frábærlega á mótinu.