Yfir­maður CIA í Moskvu

Uppfært: Nú er komið í ljós að John Ratcliffe, yfirmaður Leyniþjónustu Bandaríkjanna (CIA) var um borð, samkvæmt heimildum CBS News. Hvern hann fór að hitta liggur ekki fyrir.

Dmitrí Peskóv, talsmaður Vladimírs Pútín, var spurður út í flugvélina í morgun og sagðist hann þá ekki hafa neinar upplýsingar um hana. Enn fremur sagði hann ekki standa til að ræða við bandaríska erindreka í vikunni, samkvæmt TASS fréttaveitunni, sem er í eigu rússneska ríkisins.

Mögulegt er að flugvélin hafi verið notuð til að flytja Jared Kushner, tengdason Donalds Trump, og Steve Witkoff, vin forsetans, sem hafa starfað sem sérstakir erindrekar hans. Þeir hafa áður farið til Rússlands á fund við ráðamenn þar.

Viðræður milli ríkjanna um Úkraínustríðið, sem þeir voru að reyna að finna lausn á, hafa ekki skilað árangri. Kushner og Witkoff ferðuðust síðast til Rússlands í janúar.

Samkvæmt frétt Reuters var flugvélinni flogið frá Riga í Lettlandi og var henni lent í Moskvu í morgun.

Fyrst hafði flugvélin þó verið í Andrews-herstöðinni nærri Washington DC en henni var flogið til Riga þann 23. ágúst. Andrews er heimaflugvöllur flugvéla forsetaembættisins.

Í frétt NBC News segir að fyrirspurnir um flugvélina hafi verið sendar til varnarmálaráðuneytis Bandaríkjanna, Hvíta hússins, sendiráðs Bandaríkjanna í Moskvu og sendiráðs Rússlands í Washington DC. Engin svör hafi borist.