Daði í baði

10 ástæður fyrir því að virðisaukaskattshækkun á baðlón er galin

Daði Már Kristófersson fjármálaráðherra var til viðtals á RÚV, bæði í Speglinum og í sjónvarpsfréttum um liðna helgi. Þar kom fram að ríkisstjórnin ætlar sér að sækja 3 til 4 milljarða króna til ferðaþjónustunnar, með hækkun virðisaukaskatts á baðlón úr 11% í 24%. Þess ber að geta, að Viðreisn þvertók fyrir það í kosningabaráttunni fyrir síðustu kosningar til Alþingis, að þau ætluðu að hækka virðisaukaskatt á ferðaþjónustu. Svo mikið fyrir þau loforð! Orðræða Daða vakti athygli mína. Hann talaði um baðlónin sem ákveðinn “lúxus”, sem óhætt væri að skattleggja miklu meira án þess að umtalsverð neikvæð áhrif kæmu fram, þessi þjónusta væri nefnilega svo dýr. Sennilega er Daði í þessu lúxustali að miða við verð á aðgöngumiða í almenningssundlaugar landsins, sem er niðurgreiddur af sveitarfélögum að stærstum hluta. Það má leiða að því líkur, að ef notendur sundlauga greiddu fullt verð, myndi sú upphæð vera á pari við meðalverð á aðgangi í baðlón. Munurinn á baðlónum og sundlaugum er hins vegar sá, að baðlón skapa verðmæti, sem m.a. eru notuð til að greiða niður rekstur almenningssundlauga á Íslandi. Í þessu samhengi má einnig geta þess að samkvæmt rannsóknum Ferðamálastofu fara um 55% erlendra ferðamanna í náttúruböð og baðlón. Það má slá því föstu að það hlutfall myndi lækka verulega með hærri virðisaukaskatti. En þetta finnst Daða allt “réttlætanlegt” enda hefur ferðaþjónustan notið “sérmeðferðar” til þessa.

1.Hækkun virðisaukaskatts á baðlón vegur að samkeppnishæfni allrar ferðaþjónustunnar, sem á nú þegar undir högg að sækja.

2.Baðlónin eru ein sterkasta sérstaða Íslands sem áfangastaðar, krúnudjásn sem skapa gríðarleg verðmæti og hafa óendanlega möguleika til að skapa enn meiri verðmæti - stækka kökuna!

3. Það eru allar líkur á því, að hækkun virðisaukaskatts á baðlón muni valda því að skatttekjur af þessari starfsemi dragist saman, í kjölfar minni eftirspurnar. Kakan minnkar!

4. Baðlónin eru ekki eyland. Þau eru stór hluti af virðiskeðju ferðaþjónustunnar, tilvist þeirra stuðlar að uppbyggingu í kringum þau og eykur líkur á lengri dvöl ferðamanna í þeim landshlutum sem þau starfa.

5. Baðlón á landsbyggðinni stuðla að dreifingu ferðamanna um landið og styðja við markmiðið um að byggja upp ferðaþjónustu um allt landið og allt árið. Ef rekstrargrundvöllur baðlóna raskast og heilsársopnun verður ekki lengur raunhæf, þá hefur það afdrifaríkar afleiðingar á viðkomandi byggðarlög.

6. Hækkun virðisaukaskatts á baðlón er ekki skattahækkun á fyrirtækin sem slík, heldur skattur á neytendur - sem eru erlendir ferðamenn, Íslendingar og ekki síður heimamenn.

7.Hækkun virðisaukaskatts á baðlón hefur neikvæð áhrif á vísitölu neysluverðs og vinnur þar með gegn verðbólgumarkmiði Seðlabankans.

8. Hækkun virðisaukaskatts á baðlón dregur úr hvata og getu baðlóna til frekari fjárfestinga og framþróunar.

9. Velflest baðlón landsins eru staðsett á landsbyggðinni og þau heilsársstörf sem lónin skapa skipta sköpum.

10.Heildarafkoma ferðaþjónustunnar á Íslandi árið 2025 var um 20 milljarðar króna. Í riti Fjármálastöðugleikanefndar varar hún við veikri eiginfjárstöðu íslenskra ferðaþjónustufyirtækja, bæði í innlendum og erlendum samanburði. Er skattahækkun líkleg til að laga þá stöðu?

Það eru allar líkur á því að Daði „lendi í baði“!

Framkvæmdastjóri Katla DMI ehf og fyrrverandi formaður Samtaka ferðaþjónustunna.