Gísli Þor­geir með níu mörk í níu skotum þegar Magdeburg vann Ofurbikarinn

Füchse Berlin skoraði fyrsta mark leiksins en það var í eina sinn í dag sem Berlínarrefirnir leiddu.

Magdeburg var mun sterkari aðilinn og um miðjan fyrri hálfleik voru þýsku meistararnir komnir með fimm marka forskot, 10-5. Sami munur var á liðunum í hálfleik, 20-15.

Magdeburg skoraði fyrstu tvö mörk seinni hálfleiks, náði sjö marka forskoti, 22-15, og hélt uppteknum hætti það sem eftir lifði leiks.

Gísli Þorgeir fór mikinn í leiknum en hann skoraði níu mörk og var með hundrað prósent skotnýtingu. Hafnfirðingurinn gaf einnig þrjár stoðsendingar.

Ómar Ingi Magnússon og Elvar Örn Jónsson skoruðu eitt mark hvor í leiknum. Albin Lagergren var næstmarkahæstur hjá Magdeburg með átta mörk og þeir Matthias Musche og Magnus Saugstrup skoruðu báðir fimm mörk. 

Mathias Gidsel skoraði tíu mörk fyrir Füchse Berlin og Hákun West Av Teigum sjö mörk.

Magdeburg hefur titilvörn sína í þýsku úrvalsdeildinni á útivelli gegn strákunum hans Guðjóns Vals Sigurðssonar í Gummersbach þarnæsta sunnudag.