Hleypur aldrei aftur eftir hjartastopp

Hin 39 ára gamla Simpson, sem er fyrrverandi heimsmeistari í 1.500 metra hlaupi, var í miðju hlaupi í Norður-Karólínu þegar hún fór í hjartastopp og hneig niður.

Læknum tókst að bjarga lífi Simpson en hún hefur nú verið greind með sjaldgæfan, arfgengan hjartasjúkdóm (ARVC) sem veldur því að próteinin sem venjulega halda hjartavöðvafrumum saman virka ekki sem skyldi.

„Hjartað mitt varð fyrir alvarlegum skaða og losti. Lungun áttu líka í erfiðleikum,“ sagði Simpson á Instagram. Hún er þakklát fyrir þann feril sem hún hefur átt.

„Framtíð mín er ótrúleg gjöf. Hún er vongóð og mun áfram hafa mikinn tilgang.

En greiningin þýðir líka að það væri hættulegt fyrir mig að byrja að hlaupa aftur. Þeim kafla er lokið. Sem betur fer er sögu minni ekki lokið,“ sagði Simpson.

„Ég er yfirmáta þakklát fyrir þann feril sem ég átti,“ bætti hún við.

Simpson vann 1.500 metra hlaupið á HM 2011 og hlaut brons á Ólympíuleikunum í Ríó 2016. Hún vann einnig silfur í 1.500 metra hlaupi á HM 2013 og 2017.