Fundu vinningsmiðann eftir tveggja daga leit í rusli

Konan henti miðanum í rusl í verslun í Bitonto í suðurhluta Ítalíu eftir að hún skoðaði tölurnar sínar og fékk þau skilaboð í verslun að ekki væri hægt að greiða út vinning. Í frétt BBC segir að konan hafi uppgötvað þegar hún kom heim að líklega væri vinningur á miðanum eftir að ættingjar hennar bentu henni á að tölurnar hennar hefðu verið dregnar úr pottinum.

Í kjölfarið var sett af stað tveggja daga leit í „ruslhrúgu“ sem hafði verið sótt úr versluninni sem hún henti miðanum í. Starfsmenn sorphirðufyrirtækisins aðstoðuðu konuna við að finna miðann.

„Þetta er ekkert annað en kraftaverk,“ er haft eftir Roberto Nicola Toscano, framkvæmdastjóra fyrirtækisins, í ítalska miðlinum Ansa.

Toscana sagði að konan hefði aðeins fengið skilaboð um að ekki væri hægt að greiða út vinninginn því hann hefði verið of hár fyrir verslunina til að greiða. Þegar konan kom aftur heim benti fjölskylda henni á að tölurnar hennar 2, 4, 8, 10, og 51, hefðu verið dregnar út.

„Það var þá sem hún uppgötvaði misskilninginn. Þannig að þau fóru öll í verslunina en komust þá að því að búið væri að henda miðanum og sækja ruslið.“

Fundu bílinn og skoðuðu ruslið

Konan hafði þá samband við sorphirðufyrirtækið sem komst að því hvaða bíll hefði sótt ruslið og hvar hann hafði losað sig við ruslið.

„Sem betur fer var sunnudagur, annars hefði ruslið þegar verið farið í urðun,“ sagði Toscano.

Bíllinn var svo fluttur á stað þar sem ruslið var allt skoðað og eftir tveggja daga leit tókst þeim loks að finna miðann.

„Hann var í holóttum poka með öðrum miðum, miðinn hennar var einn af þeim sem voru óskemmdir.“

Fram kemur í frétt BBC að kostnaðurinn við leitina verði greiddur af vinningshafanum sem hafði fyrir leitina skrifað undir yfirlýsingu um að hún myndi greiða allan kostnað við leitina.