Ný heimildar­mynd um bana­slys Ólympíu­meistarans

Eftir farsælan feril í skíðaskotfimi, sem skilaði meðal annars tveimur ólympíugullum, skipti þýska íþróttakonan Laura Dahlmeier um gír árið 2019. Hún skipti yfir í ofurhlaup í fjöllum og hóf einnig að stunda fjallaklifur.

Þann 28. júlí 2025 ætlaði Dahlmeier að klífa hið rúmlega sex þúsund metra háa fjall Laila Peak í Pakistan en þá varð slysið hræðilega. Í 5700 metra hæð varð Dahlmeier fyrir grjóthruni og tveimur dögum síðar fannst hún látin.

Í nýrri heimildarmynd segja nú nokkrir frá þessum örlagaríka degi.

„Snjóflóð, grjót og ís féllu stöðugt niður í átt að grunnbúðunum,“ sagði spænski fjallgöngumaðurinn María Martín, sem hitti Dahlmeier á fjallinu nokkrum dögum fyrir banaslysið, í heimildarmyndinni samkvæmt þýska blaðinu Bild.

Martín mun hafa varað Dahlmeier við og reynt að fá hana til að snúa við.

„Ég reyndi að útskýra að það væri hættulegt, ómögulegt,“ sagði Martín.

Vegna erfiðra aðstæðna sem ríktu var ekki hægt að hefja björgunaraðgerðir fyrr en daginn eftir slysið.

„Við íhuguðum allar mögulegar leiðir til að komast þangað, en við vissum öll að hver sá sem reyndi að komast þangað gerði það með líf sitt að veði,“ sagði björgunarmaðurinn Alan Rousseau.

Laura Dahlmeier varð 31 árs. Á ferli sínum í skíðaskotfimi vann hún 15 verðlaun á HM: sjö gull, þrjú silfur og fimm brons. Á Vetrarólympíuleikunum 2018 vann hún tvö gull og ein bronsverðlaun.