Innlent

Flug­mennirnir sviptir flugréttindum

Rafn Ágúst Ragnarsson skrifar
Lágflugið bar nafn með rentu.
Lágflugið bar nafn með rentu. Aðsend

Tveir flugmenn voru sviptir flugréttindum tímabundið, annar í eitt ár og hinn í tvö, fyrir að hafa flogið flugvél Icelandair í lágflugi yfir Vestmannaeyjar þann ellefta apríl.

Þórhildur Elín Elínardóttir samskiptastjóri hjá Samgöngustofu segir að búið sé að tilkynna þeim ákvörðunina. RÚV greindi fyrst frá.

Flugstjóri vélarinnar var að fljúga sitt síðasta flug með Icelandair þegar ákveðið var að fljúga kveðjulágflug yfir heimabyggðina í Eyjum. Flugmaðurinn sem flaug með honum var sviptur leyfi í ár og hefur ekki fengið að fljúga á meðan rannsókn málsins stendur samkvæmt umfjöllun Ríkisútvarpsins.

Þórhildur segir flugmennina hafa kost á að kæra ákvörðun Samgöngustofu til ráðuneytisins en ekki er ljóst hvort það hafi verið gert. Rannsókn Samgöngustofu er nú lokið en ekki hefur verið tekin ákvörðun gagnvart félaginu Icelandair.

Uppfært 15:07: Áður kom fram að þeir hefðu verið sviptir flugleyfum. Rétt er að þeir voru sviptir flugréttindum. Þá er rannsókn Samgöngustofu lokið gagnvart flugmönnunum.

Lágflug Icelandair yfir Vestmannaeyjum Icelandair Samgöngumál Flug

Tengdar fréttir

CNN og ABC fjalla um Eyjaflugið

Lágflug farþegaþotu Icelandair yfir Vestmannaeyjabæ síðastliðinn laugardag heldur áfram að vekja heimsathygli en bandarísku sjónvarpsstöðvarnar CNN og ABC hafa nú báðar fjallað um flugið.

„Við lítum þetta mál mjög alvarlegum augum“

Forstjóri Icelandair segir að verklag og reglugerðir verði áréttaðar við starfsfólk flugfélagsins eftir að reyndur flugstjóri ákvað án samráðs við flugfélagið að fljúga í lágflugi yfir Vestmannaeyjum á laugardaginn. Málið er á borði lögreglu.

Aðstoðarflugmaðurinn gæti talist samábyrgur

Samgöngustofa hefur hafið rannsókn á lágflugi farþegaþotu Icelandair yfir Vestmannaeyjabæ á laugardag. Ráðamenn Icelandair líta atvikið mjög alvarlegum augum. Bæjarstjórinn í Vestmannaeyjum gerir hins vegar lítið úr því og fullyrt er að farþegar um borð hafi fagnað stórkostlegri upplifun.

Flugstjórinn þögull sem gröfin

Ólafur Bragason flugstjóri, sem lauk ferli sínum sem flugstjóri hjá Icelandair með lágflugi yfir Vestmannaeyjum á laugardaginn, ætlar ekkert að tjá sig um flugið að svo stöddu. Málið er litið alvarlegum augum hjá Icelandair sem hefur tilkynnt málið til lögreglu.

Mest lesið


Fleiri fréttir

Sjá meira


×

Mest lesið