Byrjaði skyndi­lega að taka konuna háls­taki og hélt í 40 sekúndur

Atvikin sem málið varðar áttu sér stað að nóttu til í maí 2022.

Manninum, sem heitir Finnbogi Þór Gunnarsson, var gefið að sök að beita konuna ofbeldi og ólögmætri nauðung eftir að þau hafi byrjað að hafa samræði með beggja vilja, til þess að halda samræðinu áfram. Hann neitaði sök.

Í ákæru segir að hann hafi tekið um háls konunnar og þrengt að meðan hún reyndi að fá hann til að hætta, meðal ananrs með því að slá í hann. Maðurinn hafi hins vegar slegið konuna ítrekað í lærið, hrækt í andlit hennar, slegið hana utan undir, rifið í hár hennar og sett getnaðarlim sinn í endaþarm hennar.

Fyrir vikið hlaut konan ýmsa áverka um líkamann.

Kynntust á stefnumótaforriti

Finnbogi og konan kynntust á stefnumótaforriti og höfðu hist einu sinni áður fyrir umrædda nótt. Þeim bar saman um að í fyrra skiptið sem þau hittust hafi þau stundað kynlíf og bæði verið sátt við það. Að sögn Finnboga voru atvikin svipuð í bæði skiptin sem þau hittust, nema í seinna skiptið hafi hann beitt hana hálstaki en ekki í það fyrra. Hann sagði hana hafa viljað það.

Umrædda maínótt hafi þau hist í miðbæ Reykjavíkur og ákveðið að fara heim til hennar að stunda kynlíf. Bæði munu hafa verið nokkuð drukkin. Þrátt fyrir það sögðust bæði hafa verið ágætu ástandi og muna vel eftir atvikum.

Að sögn hennar hafi samræði þeirra verið eðlilegt til að byrja með, en skyndilega hafi hann beitt hana ofbeldi meðan hann lá ofan á henni. Það gerði hann með því að taka hana föstu kyrkingartaki sem hún taldi að hefði varað í um fjörutíu sekúndur, og varð til þess að hún átti erfitt með andardrátt, og ekki komið upp orði. Svo hafi hann beitt hinu ofbeldinu, líkt og greinir í ákæru.

Framburður hennar á Neyðarmóttökunni, hjá lögreglu, og fyrir dómi mun hafa verið sambærilegur. Framburður Finnboga var einnig skýr og stöðugur frá upphafi. Þó var það mat dómsins að framburður hans ætti síður stoð í gögnum málsins en hennar, og var hennar framburður því lagður til grundvallar.

Ekki samþykki fyrir ofbeldinu

Í dómnum segir að Finnboga hafi átt að vera ljóst að samþykki konunnar næði „ekki til þeirrar ofbeldisfullu háttsemi sem hann beitti hana. Engin gögn benda til þess að hann hafi mátt ætla að samþykki lægi fyrir.“

Líkt og áður segir var Finnbogi dæmdur í tveggja ára fangelsi. Þá er honum gert að greiða konunni tvær milljónir króna í miskabætur, og annan sakarkostnað upp á tæplega fjórar milljónir króna.

Fréttin hefur verið uppfærð.