Skoraði í styrktarleik fyrir móður sína

Leikurinn var styrktarleikur vegna veikinda sem Helga Guðmundsdóttir glímdi við. Hún háði baráttu við illvígt krabbamein og lést í vikunni. Að ósk Helgu mun allur ágóði leiksins renna óskertur til heimahjúkrunar Heilbrigðisstofnunar Suðurlands á Selfossi.

Á 48. mínútu leiksins var klappað fyrir Helgu.

Helga er móðir Arons Fannars Birgissonar, leikmanns Selfoss, en hann lék með Árborg sumarið 2022, þá á láni frá Selfossi. Hann lék níu leiki fyrir félagið og skoraði fimm mörk.

900 miðar seldust í forsölu og það var því mjög vel mætt á JÁVERK-völlinn í kvöld.

Viðar Örn Kjartansson skoraði tvö mörk í fyrri hálfleik og þeir Brynjar Bergsson og Elías Karl Heiðarsson bættu við mörkum. Selfoss var 4-0 yfir í hálfleik og úrslitin því ráðin.

Það var síðan vel við hæfi að Aron Fannar Birgisson skoraði fimmta og síðasta markið ellefu mínútum fyrir leikslok. Hann innsiglaði því sigurinn í styrktarleik fyrir móður sína. 

Aron Fannar var einnig valinn maður leiksins í kvöld. 

Með sigrinum komst Selfossliðið í átta liða úrslit keppninnar.