Tvær ís­lenskar lyftingakonur urðu Evrópu­meistarar

Anna Guðrún Halldórsdóttir varð Evrópumeistari í 86 kílóa flokki 55 ára kvenna. Anna Guðrún lyfti 58 kílóum í snörun og 76 kílóum í jafnhendingu eða samtals 134 kílóum. Anna Guðrún tryggði sér þar með gullverðlaunin.

Anna Guðrún var ekki bara að vinna Evrópugullið heldur einnig að verja það. Þetta er jafnframt þriðji Evrópumeistaratitill hennar í röð. Hún hafnaði jafnframt í sextánda sæti af 417 keppendum sem kláruðu keppni þvert á flokka.

Annar Evrópumeistaratitill Íslands kom í -77 kílóa flokki 45 ára kvenna þar sem Hrund Scheving stóð uppi sem sigurvegari með 70 kílóum í snörun og 86 kílóum í jafnhendingu. Hún lyfti því samtals 156 kílóum en Hrund hafnaði í 31. sæti af 417 keppendum sem kláruðu keppni þvert á flokka.

Í sama flokki og Hrund hafnaði Erla Guðmundsdóttir í fimmta sæti með 63 kg í snörun, 85 kg í jafnhendingu og 148 kg samanlagt.

Jóhannes Þór Ævarsson keppti í flokki M50-94 kg og hafnaði í 11. sæti með 78 kg í snörun, 100 kg í jafnhendingu og 178 kg samanlagt.

Gísla Rún Kristjánsdóttir keppti í flokki W45 -63 kg og hafnaði í 12. sæti með 40 kg í snörun, 56 kg í jafnhendingu og 96 kg samanlagt.

Dísa Edwards keppti í flokki W35 –63 kg og hafnaði í 7. sæti með 68 kg í snörun, 80 kg í jafnhendingu og 148 kg samanlagt.

Margrét Bára Þorkelsdóttir keppti í flokki W40 -69 kg og hafnaði í 4. sæti með 60 kg í snörun, 88 kg í jafnhendingu og 148 kg samanlagt.

Steinunn Sveinsdóttir keppti í W60 -86 kg og hafnaði í 5. sæti með 32 kg í snörun, 38 kg í jafnhendingu og 70 kg samanlagt.

Sigríður Lína Viðarsdóttir keppti í W35 -77 kg og hafnaði í 15. sæti með 57 kg í snörun, 70 kg í jafnhendingu og 127 kg samanlagt.

Íslenska kvennaliðið hafnaði jafnframt í 9. sæti í stigakeppni þjóða af 10 þjóðum með samtals 164 stig, einu stigi minna en Írland í 8. sæti. Frakkland sigraði í liðakeppni kvenna með 215 stig.