Hleypur í ó­venju­legum að­stæðum: „Rosa­legur hiti hérna“

Elísa hefur góða reynslu af því að hlaupa á Ítalíu. Fyrr á árinu vann hún og setti brautar­met í 75 kíló­metra hlaupi þar í landi í sterku hlaupi. Fram­undan núna er 80 kíló­metra­hlaup í Dólómítunum. Hita­bylgja gengur nú yfir megin­land Evrópu. Þó aðstæðurnar séu skárri uppi í fjöllunum er hitinn samt sem áður óvenju­legur.

„Ég er mjög spennt fyrir hlaupinu. Er búin að fara í tvær brautar­skoðanir og held út frá þeim að brautin eigi eftir að henta mér mjög vel. Það er aftur á móti rosa­legur hiti hérna. Þrjátíu gráður og full sól. Maður þarf að vera dug­legur að sjá vel um sig í hlaupinu. Kæla sig niður og svona. Mikilvægt að flaska ekki á því.“

„Ég myndi ekki kjósa þessar aðstæður fyrir 80 kíló­metra hlaup en ég er búin að vera mjög dug­leg í hitaþjálfun. Hún vonandi skilar sínu gagni á laugar­daginn. Ég ætla ekki að fara búa til áhyggjur yfir því sem ég ræð ekki við. Það eru allir í sama pakkanum þarna.“

Hlaupararnir munu keppa í stór­brotnu um­hverfi og er það ekki svo að það taki ein­beitinguna frá keppnis­brautinni sjálfri.

„Ég þarf frekar að minna mig á að líta aðeins upp. Að vera ekki bara að ein­blína á stiginn fyrir framan mig. Leyfa mér aðeins að horfa upp og njóta þess sem er í kringum mig. Það er meira vesen heldur en hitt. Þetta er mögnuð náttúra, geggjað um­hverfi. Þvílík forréttindi að geta hlaupið í þessu.“

Lavar­edo utan­vega­hlaupið á sér ríka sögu og á Elísa von á mjög sterku hlaupi þar sem að mark­mið hennar eru skýr.

„Það væri al­gjör draumur að vera alla­vega á verð­launasæti, fyrstu þrem. Eins langar mig að reyna vera í kringum níu tímana með þetta verk­efni, 80 kíló­metrar og 4500 hæðar­metrar. En maður verður bara að sjá. Eins og ég segi þá er gríðar­legur hiti. Ég hef aldrei hlaupið í slíkum hita. Það kemur bara í ljós hvernig það mun ganga. Eins er ég að hlaupa uppi í mikilli hæð. Sem maður getur ekki æft á Ís­landi. Það eru alls konar áskoranir sem maður reynir að tækla eins vel og hægt er.“

Viðtalið við Elísu, sem sýnt var í Sportpakkanum á Sýn eftir kvöldfréttir í kvöld, má sjá í spilaranum hér fyrir ofan.