Sex hand­teknir í vændisrassíu lög­reglu

Aðgerðir lögreglu hófust á mánudag og þeim lauk á föstudag. Á þeim tíma fór lögregla inn á átta staði á höfuðborgarsvæðinu þar sem höfð voru afskipti af hátt í tíu kínverskum konum sem lögregla telur að kunni að hafa verið gerðar út í vændi.

Tveimur kvennanna var vísað úr landi þar sem þær höfðu ekki dvalarleyfi. Öðrum var boðin þjónusta og úrræði sem ætluð eru mögulegum þolendum mansals.

Samkvæmt íslenskum lögum er ekki refsivert að selja vændi. Refsing beinist hins vegar að þeim sem kaupa vændi, þeim sem hafa milligöngu um vændi annarra eða hafa af því tekjur.

Ýmist Íslendingar eða erlendir ríkisborgarar

Mennirnir sex sem grunaðir eru um kaup á vændi voru færðir á lögreglustöð þar sem teknar voru af þeim skýrslur. Þeim var jafnframt boðið að ljúka málum sínum með sektargerð. Ekki liggur fyrir hversu margir þeirra þáðu sektargerð eða höfnuðu henni, en einhverjir þó. Í hópi mannanna eru bæði Íslendingar og erlendir ríkisborgarar.

Lögregla hafði einnig afskipti af mönnum sem eru grunaðir um milligöngu um sölu á vændi. Sá hluti málsins er til rannsóknar og snýr að ákvæðum almennra hegningarlaga um tekjur af vændi annarra og milligöngu um vændi.

Í 206. grein almennra hegningarlaga segir að sá sem greiðir eða heitir greiðslu eða annars konar endurgjaldi fyrir vændi geti sætt sektum eða fangelsi allt að einu ári. Sá sem hefur atvinnu eða viðurværi af vændi annarra eða stuðlar að því með milligöngu að aðrir hafi samræði eða önnur kynferðismök gegn greiðslu getur sætt fangelsi allt að fjórum árum.

Ráðherra hefur boðað breytingar

Dómsmálaráðherra hefur boðað breytingar á vændislöggjöfinni. Í landsáætlun dómsmálaráðuneytisins gegn kynbundnu ofbeldi er meðal annars lagt upp með að skoða hvort hægt verði að nafngreina vændiskaupendur þegar mál þeirra fara fyrir dómstóla. Þá verði unnið að því að þyngja refsingar þannig að lágmarksrefsing fyrir vændiskaup verði fangelsi en ekki sekt.

Þorbjörg Sigríður Gunnlaugsdóttir dómsmálaráðherra hefur sagt að núverandi framkvæmd dragi ekki nægilega úr eftirspurn eftir vændi, þar sem vændiskaup endi í framkvæmd oft með sekt nema um ítrekuð brot sé að ræða. Þá hefur hún sagt mikilvægt að réttarstaða þeirra sem selja vændi verði treyst, meðal annars þegar kemur að auglýsingum um vændi.