Munaði minnstu að hún væri sjálf komin út í þegar á­rásin varð: „Það verður bara allt í blóði í sjónum“

„Ég vil nú kannski ekki kalla þetta árás vegna þess að þessir hákarlar eru ekki að ráðast á okkur, þeir halda kannski að við séum selur eða matur,“ segir Ásta Hafþórsdóttir en það munaði minnstu að hún væri sjálf komin út í sjó þegar að þriggja og hálfs metra langur hvítháfur, (e. great white shark), birtist skyndilega og beit konuna og gerði sig líklegan til að draga hana í kaf. Konan var flutt af vettvangi í lífshættulegu ástandi en er nú sögð stöðug.

Hefði getað verið ég

Ásta er sem stendur í Ástralíu við tökur á nýjustu mynd Baltasars Kormáks, The Big Fix. Hún segir ströndina vera mjög vinsæla meðal ferðamanna og tekur fram að í gær hafi verið lítill öldugangur og margt fólk sem naut sín í góða veðrinu.

„Ég er rétt komin niður á strönd þegar það heyrist væl í sírenum. Ég tek eftir því að það eru allir að hlaupa upp úr sjónum og það er einhver ungur maður á bretti í sjónum að greinilega bjarga konu og það verður bara allt í blóði í sjónum,“ segir Ásta. Maðurinn hafi svo reynt að koma konunni á þurrt land með herkjum. 

„Svo eru sem betur fer bæði læknar og einhverjir aðrir þarna sem brugðust hratt við“.

„Ég var kominn niður á ströndina sjálfa og ef ég hefði verið tíu mínútum fyrr, þá hefði ég verið kominn út í sjó. Það þýðir náttúrulega ekkert að hugsa þannig en þetta hefði getað verið ég en þetta var ekki ég þannig að það er bara þannig,“ segir Ásta. Samkvæmt ástralska miðlinum Sky news hlaut konan alvarlega áverka á handlegg og fótlegg og hún er sögð í stöðugu ástandi en í lífshættu.

Ótrúleg hetjudáð mannsins

 Ásta segir það ekki hafa svo mikið sem hvarflað að henni að lenda í árás sem þessari. Fólk á svæðinu hafi áður sagt henni að hafa engar áhyggjur.

„Það eru engir hákarlar og þú þarft ekkert að vera smeyk við það og svo bara gerist þetta. Sem er auðvitað ekki mjög algengt og sumir segja líka bara já, já, en það eru meiri líkur á að þú verðir fyrir bíl heldur en að þetta gerist,“ segir hún og bætir við að henni hugnist ekki að fara aftur í sjóinn eftir atvikið.

Ásta segir einnig frá því að maðurinn sem hafi verið fyrstur að konunni sé álitin hetja eftir björgunina.

„Hann var ekki í björgunarstörfum þarna en hann var búinn að læra björgun og hann ætlar að grípa hana þegar að hákarlinn dregur hana niður,“ segir hún.

Hann hafi strax séð hve gríðarlega stór hákarlinn væri og þannig áttað sig á því að hann gæti ekki reynt að ýta við honum eða fæla hann. Í kjölfarið náði hann taki á hendi konunnar og komið þeim báðum í land. Á meðan hafði hákarlinn sveimað í sjónum í kringum þau.

„Þetta er ótrúleg hetjudáð að hafa náð henni á land,“ segir Ásta.

Árásirnar um þrettán hundruð

Hún segir hákarlinn hafa verið um þrjátíu metrum frá flæðarmálinu sem sé „mjög, mjög nálægt“ og að það sé í rauninni innan við það sem fólki er ráðlagt að synda ekki út fyrir. Það sé mögulega það sem veki mesta skelfingu hjá fólki að hann hafi komist svona nálægt landi án þess að nokkur yrði hans var.

„Það eru þyrlur sem fljúga yfir reglulega til að fylgjast með,“ segir Ásta en í umfjöllun breska ríkisútvarpsins (BBC) kemur fram að árásin hafi orðið á Coogee-strönd sem er austarlega í Sydney. Þar er einnig greint frá því að konan sé þrjátíu og fimm ára en í síðustu viku lést kafari eftir að hafa verið bitinn af hákarli sem talinn er hafa verið fjögurra og hálfs metra langur suðaustur af Perth í Vestur-Ástralíu.

Hákarlsárásir við Ástralíu eru algengari en víða annars staðar í heiminum, þótt þær séu ekki endilega alltaf banvænar. Frá því að skráningar hófust árið 1791 hafa verið skráðar tæplega þrettán hundruð hákarlsárásir í Ástralíu og hafa rúmlega 260 þeirra leitt til dauða eftir því sem fram kemur í grein BBC.

„Sumir vilja meina að þetta sé bara svona og við förum í sjóinn bara á okkar eigin ábyrgð og að þetta sé þeirra umráðasvæði og það sé lítið við því að gera en þetta er stór partur af lífi fólks hér að fara í sjóinn og synda allt árið um kring,“ segir Ásta en í Sydney er mikil brimbrettamenning sem og gríðarlegur hiti á sumrin.

Eins og í kvikmynd

Hún segir það hafa verið í umræðunni að setja niður net sem eiga að koma í veg fyrir svona en það hafi verið búið að fjarlægja þau einhvern tímann í apríl, þannig að það hafi ekki verið nein net og engir drónar.

„Þannig að það er mikil reiði í fólki núna og miklar umræður og þetta er náttúrulega bara hræðilegt. Þetta var bara, já, ung móðir sem að bara, þú veist, var bara að synda og og var ekki að taka neina áhættu þannig, hún var ekkert að fara langt út fyrir heldur sko,“ segir hún sömuleiðis og bætir við að það hafi verið fjallað um það í áströlskum fréttum að það hefðu átta eða níu hákarlar verið „spottaðir“ undan ströndum borgarinnar.

„Það er búið að loka á flestum ströndum þarna á þessu svæði í einhvern tíma, ég veit ekki hvað það verður lengi, en þetta var bara eins og að vera stödd í einhverri kvikmynd sko, ég er bara ennþá ekki alveg búin að ná utan um þetta sko, óraunverulegt,“ segir hún.